لا يُخفى على الجميع أن الشخصيات الشريرة هما أساس أي قصة قوية وهما اللي بيقدروا يزودوا من عنصر التشويق في أحداث القصة وبيمنحوا فرصة كبيرة للبطل انه يظهر نقاط قوته وضعفه للاعب

على قد ما في شخصيات كتير قدرت تبهرنا بمستوى كتابتهم أو تصميمهم ولكن للأسف كان بيعاني البعض من إخفاق كبير بسبب عدد المرات اللي بيظهروا فيها قدام الشاشة أو بسبب إن المعارك بتاعتهم بتبقى سهلة بشكل مبالغ فيه لدرجة تخليك متفتكرهاش تماماً، الأمثلة عن الموضوع ده كتير ولكن احنا أختارنا ليكم أكتر خمس شخصيات قدروا يبهرونا وفي نفس الوقت أتظلموا بقلة ظهورهم

 

- VAAS

 

 رائعة يوبي سوفت اللي نزلت في 2012 فار كراي 3 قدمت مثال يحتذى به في تقديم الشخصيات الشريرة من خلال الغني عن التعريف ڤاس، واللي أصبح أيقونة في عالم الألعاب وماركة مسجلة في تاريخ سلسلة فار كراي بشكل عام، ولكن بالرغم من كده الشخصية عانت من بعض المشاكل اللي كان تجنبها سهل ولكن للأسف المطوريين أضاعوا الفرصة، والمشاكل دي ممكن تتلخص في عدم ظهوره بشكل كافي في أحداث اللعبة، ولو حبيت تتفرج على كل المشاهد اللي ظهر فيها هتلاقيهم أقل من 10 دقائق، وده لأنه مكنش الشخصية الشريرة الرئيسية في اللعبة، وبشكل غير مفهوم المطوريين أهدروا كل المقومات عند ڤاس عشان يكون شخصية هويت فولكر البديل له بعد المهمة الثامنة من أحداث القصة، واللي كان شخصية ضعيفة كتابياً ومعندوش نفس كاريزما ڤاس ونسيناه بسرعة جداً وحتى المعركة معاه كانت سهلة

 

- EREDIN

 

سواء كان سبق لك قراءة كتب ويتشر قبل ما تلعب الجزء التالت أو كنت مهتم بالحوارات في اللعبة هتقدر تعرف بسهولة إن إريدين واحد من أهم الشخصيات في عالم ويتشر 3 والند الأقوى على الإطلاق للبطل جيرالت أوف ريفيا إن لم يكن هو الوحيد اللي قدر يتسبب في زلزال بداخل عقل جيرالت وكان مصدر رعب وقلق ليه طوال الوقت، وعلى الرغم من إن اللعبة قدرت توحي للاعبين الإحساس بالخطر ده من خلال تصميم ملابس الشخصية المميزة جداً وقدرته على حرق قرى بالكامل وقتل ونهب كل ما فيها في بضعة ثواني، ولكن للأسف متمش استغلال العناصر القوية دي بالشكل اللي يستحقه وظهوره في اللعبة كان محدود جداً لدرجة انك ممكن تحس إن محادثة جيرالت مع إحدى الباعة المتجولين أكتر من محادثته مع إريدين

 

- POSEIDON

  

 

 يمكن من تحفظاتي على جاد أوف وور 3 حشر كم كبير جداً من آلهة الأوليمبوس في أحداث قصة مدتها الزمنية مش كبير للدرجة، وده أدى إلى إن كل إله منهم منلحقش نعرف عنه أكتر خصوصاً إن أول جزئين معملوشخلفية درامية كويسة ليهم، وكان أكتر إله فيهم عنده فرص كتير لتقديم معارك ملحمية مع كريتوس هو بوسيدون، واللي للأسف بيكون أول بوس فايت حقيقي ليك اللي من خلاله بتتعرف على أحداث اللعبة وطبيعتها الدموية، مفيش خلاف إن البوس فايت كان عظيم ومليء بالأدرينالين والحماس ولكن مواجهته مرة واحدة بس كان تقدير أقل بكتير من اللي يستحقه بوسيدون

 

RAAM - 

 

من الحصريات الأيقونية لمنصة أكسبوكس هي سلسلة التصويب من منظور الثالث جيرز أوف وور، وعلى الرغم إن مش من عناصر تميزها القصة إلا انها بتحمل في طياتها عالم مليء بالأسرار والشخصيات المميزة، وده حصل بعد النجاح الكبير اللي حققه الجزء الأول في 2006، ومن ملامح اللعبة اللي تقدر من خلالها تعرف مستوى العنف والدموية وقد ايه عالمها قاسي هو شخصية القائد رام، شخصية معندهاش أي رحمة وهدفها الرئيسي هو طاعة أوامر الملكة مايراه والقضاء على البشر مهما كان الثمن، للأسف رام مظهرش غير تقريباً في أول اللعبة وآخرها فقط ومكنش مصدر إزعاج ليك إطلاقاً طوال أحداث القصة

 

  - LADY DIMITRESCU

 

في خلال فترة وجيزة أصبحت شخصية السيدة ديميتريسكو أشهر من نار على علم وحديث الجميع، لدرجة إن كابكوم ركبت هي كمان قطر الترند وأستغلت الفرصة دي في الدعايا عن لعبة ريزيدينت إيفل 8 في أكتر منمناسبة، ولكن يريتها كان أستغلت الفرصة دي في أشياء أخرى أكتر من مجرد دعايا، ديميتريسكو ظهرت بشكل قوي وكانت مصدر قلق ليك أثناء تجولك في القصر بشكل ذكرني كثيراً بالقلق اللي كان بيتسببه مستر إكس في ريميك الجزء الثاني، ولكن ده حصل في أول ساعتين من عمر اللعبة فقط وبسبب محاولتها في تقديم أكتر من شخصية شريرة واحدة نهاية ديميتريسكو كانت عاجلة جداً بشكل ينقلك إحساس إن دورها في القصة ضعيف والدعايا دي كلها كانت على شخصية ثانوية مش الشرير الأساسي تماماً .. رغم انها بتملك مقومات وخلفية درامية أفضل بكتير من الشريرة الأساسية الأم ميراندا